| 曼聯依家無啦啦手執半隻聯賽獎盃盃耳，費格遜真係要多謝格蘭。有某位資深評述員講過，球會練就好似廚師一樣，用手頭上材料（球員）去煮一味，用「蔗渣價錢煮出燒鵝味道」固然係最高境界，若然有好材料都唔識好好利用，呢「大廚」實在要唔要都罷。 格蘭浪費好材料
章治歷並唔係馬後炮，賓尼迪斯季初實行輪換制，的確令紅軍一度陷入困境，不過成季賽事流流長，淨係靠一班骨幹球員支撐，去到季尾肯定踢到殘，仲邊有力去爭盃？能夠充分利用自己手頭上球員，先至係最難地方。 須知道，無論係盃賽定聯賽，季尾往往係最關鍵時刻，難得賓帥甘冒畀球迷同班主喪鬧風險，依然堅持輪換制，季初畀人彈到一戙都冇賴恩巴布、禾路連等都已交足功課，一眾睇死賓帥球迷同英國傳媒依家都轉晒口風，大讚「盃賽專家」賓尼迪斯有料。 相反，格蘭自接手車仔後，一直沿用番莫帥個陣式，基本上是但搵個人接手都搞得掂。可惜，經過季中蜜月期，格蘭庸碌表露無遺，完全唔識變通，早前歐聯對住費倫巴治先瀨過，返到英超對住韋根都仲未學精，贏緊一粒死守，結果咪益晒曼聯囉！成場波最好笑地方，係格蘭去到九十分鐘補時先換舒夫真高落場，幫對手 埋時間，布魯士同費格遜肯定笑到見牙唔見眼！ | 
