巴塞依家西甲落後皇馬九分，要冠軍近乎無可能。既然打入今屆歐聯四強，相信巴塞跟住落會將注意力放晒落歐聯，所以今日同城打，一於捧客軍愛斯賓奴「讓球客勝」！（有線61及64、廣東體育周日凌晨2:00直播）
巴塞搏歐聯放棄聯賽 睇番巴塞域陀華迪斯連番出醜，朗拿甸奴又有傷，陣容勁有問題，最關鍵始終係緊歐聯要惡鬥曼聯，如果到時有咩三長兩短晉唔到級，就即刻宣布今季四大皆空！所以放棄聯賽係一個合理選擇。
作客愛斯賓奴近九周聯賽輸足七場，不過上星期對奧沙辛拿停賽靴達度同薩巴列達今晚復出，達蒙度上場已經踢得番，迪拉彭拿有望可以趕得切康復，即係話個陣對比上星期，可以強番好多。考慮到愛斯賓奴近兩年踢打戰特別醒神，近三次對巴塞都保持不敗，所以今日捧「讓球客勝」，掂呀！
