| 你估真係咁易做到Special One莫連奴咁，下下贏一比○咩？由次貨領隊格蘭帶領車路士，周一聯賽竟然臨尾香畀韋根摸和痛失寶貴兩分，最令安高失望係格蘭大叔領軍功夫，攻守唔掂，又唔識變通。今晚車仔作客愛華頓，睇怕格蘭又係繼續大打孤寒波踢法，估佢勝負唔易，但博入球細應該穩陣。（now632台周五凌晨3:00直播） 聯賽剩番四周，車仔依家落後榜首曼聯五分，要後來居上唔易，就算今個月尾車仔砌得低曼聯兼全勝到季尾，都仲要望曼聯額外輸多一場，冠軍？格蘭睇怕都要寄望奇。冇錯，車仔要追分照計鬥志一定十足，客勝好似有得諗，不過你問十個，安高話十個都諗唔到佢主場對住韋根會失分，今晚要作客贏排第五、仲有機會爭歐聯入場券愛華頓，唔通真係話贏就贏咩！
 杜奧巴 林伯 齊缺陣
 事實上，最令安高擔心車仔，係佢陣中兩大王牌—前鋒杜奧巴因為膝傷將會繼續缺陣，中場林柏特就因為阿媽病重未必可以及時復出。你睇番上仗對韋根場波，安歷卡前場仲係唔多夾到班波，中場少「林8」呢個後上殺手，又係少瓣必殺技。 愛華頓 連開8口細
依安高估計，車仔就算憑質素贏波，都唔會贏得多，隨時又係格蘭絕招，入一球之後死守，好彩可以入多球或者保住勝果，唔好彩就畀人整番粒摸和，換句話講，咪係入球細囉！仲有數據可以睇睇，愛華頓都係打孤寒波專家，已經連續八場開入球細，加埋車仔近五場又有四場開細，今場博細都好正路！ | 
