| 德國盃決賽柏林上演！多蒙特五日前聯賽狂吞拜仁慕尼黑五蛋，擺到明唔夠班爭盃，最弊係多蒙特有個無間道二五仔曉姆斯，呢位年輕中堅本身係拜仁借將，聯賽對住真正老細踢到一塌糊塗，我唔係話佢流攤打假波，但唔似咁快回復到信心囉，兩隊再遇我捧客W！（亞視本港台及中央5台周日凌晨2:00直播） 時間會沖淡一切，但唔會改變事實，多蒙特上周慘負拜仁，絕對唔可以用留力、意外做輸波藉口，反而證明兩隊狀態、牌面真係相差好大。由於拜仁下季會踢歐聯，即使多蒙特呢場輸波，佢都可以用德國盃亞軍身份，拎到下屆歐協盃入場券，我明白多蒙特好恨再捧盃，不過輸波都有得踼歐洲賽，始終會影響球員戰意。 日前對賽拜仁贏5粒
睇番《踢球者》賽後報告，其實多蒙特連吞五蛋因為借將曉姆斯踢得差，佢得分係極少出現六分（得分愈高表現愈曳），搞到後防倒瀉籮蟹，假如從陰謀論睇，曉姆斯係拜仁青訓產品，面對真正老細當然唔敢亂，就算唔係咁諗，拜仁中前場都知道晒佢有咩弱點，想入波有幾難呀？ 多蒙特正副門將缺陣
再講，多蒙特有正選門將維丹費拿養傷，副選門將施格亦多數缺陣，三號門將赫特克今季首次擔正，即刻連失三球不敵漢諾威，根本信唔過，對家拜仁近八場有五勝三和，射手東尼連續兩場梅開二度，依家決賽關頭，練希斯菲特唔似會刻意收起球員，留力四日後歐協盃對辛尼特，強陣出擊抵捧！ | 
