為爭取入選歐國盃大軍，迪比亞路呢排演出更加落力，而祖雲達斯近排戰績亦叫唔錯。不過佢蝕底在上周中開完快車，今晚作客阿特蘭大顯然有少少唔數，但質素搭救下，都有權贏多場。
記得四年前偶像巴治奧又係為踢歐國盃力爭表現，依家就輪到迪比亞路，同樣都係因為「年紀大」而未被國家隊領隊重視，唔通呢就係金童宿命。唔怪得托迪早早就話明唔踢，可能就係要打破宿命。
其實祖記近兩場都贏得有運，好似對AC米蘭場，我就覺得「紅黑軍團」輸得幾慘，但我仍要不厭其煩咁再讚恩沙基，佢又梅開二度喇，好鬼服佢呢位「老人家」！歐國盃佢都好有機會入選，佢仲話想踢埋京奧添，真係愛國愛到爆燈！
推介：祖雲達斯
