| 球員唔集中，表現實唔好，桑坦德今晚西甲主場迎戰皇家馬德里，受讓平半博得過，理由有兩個，首先皇馬前鋒羅賓奴捲入嫖妓醜聞，佢前鋒位置會被沙維奧拿取代，火力難免受影響；其次皇馬近期不斷放風買球員，意味唔少球員等住執包袱，士氣受損難開W。（有線61及64、中央5台周一凌晨1:00直播） 歐聯係一個金礦人人想掘，未計周六賽事，桑坦德僅落後第四位馬德里體育會一分，難得有機會爭踢呢個歐洲頂級賽事，佢鬥心唔會差過皇馬，何況桑坦德射手梅里迪斯曾被「銀河艦隊」棄用，呢鋪倒戈肯定搏甩髀顯身價，配合佢近八場聯賽有六勝兩負旺勢，要主場搶分絕對唔係妄想。 沙維奧拿冇態頂硬上
另一方面，西班牙傳媒踢爆巴西國腳集體嫖妓，羅賓奴、巴迪斯達、迪亞高同丹尼爾被影到攬女出街，當中羅賓奴已成為被插對象，有人話佢行緊大哨、細哨條舊路，掛住蒲搞到身形暴脹冇心機踢波，《馬卡報》仲話佢激嬲皇馬練舒斯達，今晚場波，傷愈沙維奧拿會取代佢打正選， 沙維奧拿長期養傷，狀態肯定唔夠，加埋中場古迪停賽，好易破壞其他球員集中力。除此之外，近日皇馬放風想買人，目標包括有伊巴謙莫域、亨特拉爾、卡卡、迪羅斯同加度素，換句話緊好多人會被踢走，咁多麻煩好難撻得起班人戰意，何況皇馬榜首大領放，錦標在望流攤唔奇！ | 
