| 意甲尚餘五輪比賽，榜首國際米蘭為保住一哥地位，周一凌晨作客拖連奴不容有失。其實國際米蘭近期聯賽表現唔差，相信球員狀態回升之後，拖連奴就算有主場都好難對佢構成太大阻力，度士預期「客勝」可以順利開出。（有線體育台62周一凌晨2時30分直播） 國際米蘭近兩場聯賽都贏得輕鬆，面對阿特蘭大及費倫天拿都淨勝對手兩球。雖然上周中國際米蘭要出戰意大利盃，但當日練文仙尼只派出副選球員上陣，對於球隊體力唔會有太大影響。 拖連奴傷停一大籮
另外，瑞典前鋒伊巴謙莫域因傷已返老家休養，故今場會繼續起用巴洛迪利打正選。呢位加納裔意大利籍前鋒近兩場聯賽都有入球，狀態比起告魯斯以及基斯普更佳，球隊攻力未至於大幅削弱。 拖連奴剛炒練路禾連奴，重新聘請迪拜斯回來執。臨近收咧先至易帥，度士覺得對拖連奴未必係件好事。尤其球員要重新適應戰術及踢法，反而會影響到球員應有發揮。另一方面，拖連奴缺陣球員極多，蘭拿、迪米捷利及列高巴三位球員停賽。而隊長哥莫圖、中堅拿達利及門將沙連尼全部受傷。迪拜斯根本冇辦法排出最強陣容，面對強敵國際米蘭相當蝕底。 | 
