| 英超前列形勢逐漸明朗，反而護級競爭仲非常激烈，今晚維拉主場迎戰伯明翰周日打戰頭場，除係兩支死對頭榮辱之戰外，仲直接影響到伯明翰護級前途。排緊尾四伯明翰依家場場都不容有失，以莫路沙拉迪為首「外來力量」全力搶攻兼搶分，不過維拉「本土兵團」近期亦士哥頻頻，今場打大戰唔憂冇波入，「入球大」抵玩！（now632台周日晚7:00直播） 伯明翰上場失分後，已經畀保頓同富咸追到差兩分同四分，護級形勢真係非常險峻，剩低四場比賽每失一分，就向降班漩渦行近多一步，根本唔到佢唔進取，何況今晚對手係同市宿敵維拉，贏波決心就更加明顯。不過有決心都要有實力！我近排就對佢個新星莫路沙拉迪印象深刻，呢個阿根廷前鋒近四場聯賽入四球，狀態弗到漏，維拉後防都好難嘜得住佢。
 維拉2場 入10球
 事實上伯明翰前線有唔少質素高「士哥拿」，莫路沙拉迪當然會係眾矢之的，但係芬蘭射手科素同蘇格蘭前鋒麥法頓都係射得之人，球隊最近十六個聯賽入波，就有十一個係由上述「外來力量」包辦。雖然另一外來力量施巴斯坦拿臣上場一度勇戰受傷，但麥利殊已經講明會盡可能幫佢呢場大戰復出，決心不言而喻。 維拉依家排第七，仲有機會爭取來季歐協盃參賽資格，而且陣中「本土兵團」近期開行Turbo，擺到明要騷Quali博卡比路歡心，近兩場聯賽分別四蛋及六蛋贈保頓同打比郡，巴利、艾邦拉荷、艾舒利楊格同希活等土炮都大開殺戒，就算伯明翰主攻，佢一樣唔會縮，要開大話咁易啦！ | 
