| 英超好睇係因為有好多高質素外援，並唔等如英格蘭好波，國際友誼賽表現一無是處輸畀法國，再次印證點解英軍冇份爭歐國盃。近期表現急轉直下阿仙奴，雖然受周中熱身賽影響好微，但係贏保頓都唔易。 保頓主場專爆「廠」
每隊波總會有高、低潮，家陣兵工廠球員信心同季初相比明顯曳好多，近八仗僅勝一仗愈踢愈沉，當中對住伯明翰、維拉、韋根同米堡都和晒。講真，四隊之中只係維拉有番咁上下之外，其餘三隊都係榜下游隊伍，所以阿仙奴真係不在狀態。 當然，保頓方面亦唔好得幾多，自從箭頭安歷卡離隊之後唔識入波，近四場更食白果，好在仲可以維持住主場戰鬥力，起碼家陣二十六分當中有二十分靠自己地頭取得。講往績，兵工廠近八次作客銳步球場只贏過一次咁大把，證明保頓對住阿仙奴特別醒神，今晚有機會趁兵工廠分心偷雞成功！ 至於英超五連勝紅魔，上場大勝紅軍表現極佳作戰狀態，相反維拉近期狀態嚴重下滑，對住要振奮士氣作客歐聯對羅馬曼聯難逃劫數。 | 
