| 美職周日凌晨開鑼，美國人一向對英式足球唔多熱衷，勝在主辦者擅於包裝，上季碧咸空降，成功吸引萬千球迷目光，證明美國並非「足球沙漠」。碧咸取得一百頂國家帽，率領洛杉磯銀河作客科羅拉多急流，將「萬人迷」熱潮再推高，但以波論波，Mic少較睇好主隊科羅拉多急流。（now 633周日早上9時30分直播） 碧咸上季強勢加盟洛杉磯銀河，曾經令人對佢寄予厚望，結果只換來失望，連季後賽都入唔到。會方似乎仲未吸取訓，繼續推行「星戰計劃」，搵來古列治執。呢位荷蘭名宿球員時代係好醒，但講到領軍能力，實在令人不敢恭維，其浪漫足球踢法好睇唔好食，同為荷蘭三劍俠，列卡特同雲巴士頓依家都執一級勁旅，但「鞭帥」古列治失業一排後，依家只能遠赴美職搵食，就知佢有幾多斤。 季前熱身冇成效
洛杉磯銀河凡事以名氣行先，利用足球之名大搞商業活動，根本就係本末倒置。佢季前周圍飛踢熱身賽，表面要操狀態，但實際上都係為錢，可憐係連累球員疲於奔命，最傷都係碧咸，早前先至踢完國際賽，又要即刻由歐洲飛返美國，加上正值季初，佢可以發揮出幾成水準實在令人懷疑。從睇波角度，銀河係有噱頭，但就唔值得用真金白銀去捧佢場。 再睇洛杉磯銀河同科羅拉多急流交戰往績，就更加要捧主隊。銀河過去六次作客急流全敗收場，真係好似跌落「急流」，難有生還機會。 戴拿模食住革命
除科羅拉多急流主場對洛杉磯銀河之外，首輪常規賽仲有場上季總決賽翻版戰值得留意，新英倫革命主場對侯斯頓戴拿模。呢兩支球隊近年可以話係歡喜冤家，過去兩季總決賽都由佢合演，不過侯斯頓戴拿模取得一面倒優勢，兩次都成為王者，天命注定食住新英倫革命。事實上，侯斯頓戴拿模近六次作客新英倫革命取得三勝三和，Mic少今場睇好侯軍坐和望贏。 | 
