| 漫畫《足球小將》入面戴志偉，經常都會話：「大家唔好放棄，比賽先開始，未到最後一分鐘，我都有機會贏波！」 咪以為淨係漫畫先會有呢情節，其實呢排波係咁印證呢句說話：上星期六先有貝迪斯反勝巴塞；到星期日西甲又有華拉度列連入兩球，擊敗薩拉戈薩；到深夜法甲，馬賽亦作客先失一球下，到下半場反勝羅連安特。唔單止聯賽係咁，前晚歐聯，費倫巴治一樣憑毅力反敗為勝，殺退班霸車路士，唔通真係「只要有夢想，凡事可成真」？ 31歲滿場飛反勝功臣
不過睇咁多場經典賽事，小弟最欣賞，唔係貝迪斯路爾斯伊度又或者費倫巴治迪維迪，反而係馬賽老將辛頓！ 辛頓係紅軍棄將，雖然年屆三十一歲，不過呢位前荷蘭國腳一樣全場奔跑，冇錯，速度係大不如前，但佢勝在經驗同毅力搭夠，經常見佢返後場堵塞左閘位置之餘，仲走入中路幫手分波攔截，馬賽追和球就係靠佢苦纏對手，令對方交失波！畀利物浦放棄？唔緊要，淨係佢技術同鬥心，已經足以法甲尋回第二春！
| 
