| 今晚德甲有場獨腳戲上演，咪以為冇星味就冇睇頭，事關杜伊斯堡同科特布斯依家分列尾三同尾四，勝負三分對護級形勢有重大影響，肯定會打甩髀。當中杜伊斯堡有尼日利亞射手伊舒亞古重拾射門鞋飛，撞正科特布斯作客戰鬥力大減，今場杜伊讓平半，上盤有得諗！（有線62周六凌晨2:30直播）
德荷孖膽推介
德甲聯賽季尾包尾三隊要降班，依家由第十四位羅斯托克到包尾紐倫堡都只係相差四分咁大把，五隊只能活兩隊，你話杜伊斯堡同科特布斯今晚碰頭點會唔緊張？事實上，呢兩班波近排狀態都開始冒升，杜伊上周末作客贏勁旅雲達不來梅，至於科特都主場累積兩連勝，砌低拜仁慕尼黑同哈化柏林，弗鬥弗，其實唔易捉路。 杜伊射手 有料到
不過，相對講安高始終秤先杜伊一線，首先，佢今場波有地利，氣勢梗會好，淨係前個星期佢主場鬥漢諾威，就見到客軍門將安基畀杜伊球迷掟掟爆頭，今晚落場，畀你係科特布斯球員，唔驚就勢係假。此外，杜伊個尼日利亞射手伊舒亞古早排因傷抖兩周之後，上星期復出就即刻有「士哥」，今季累積入八球，信心會唔錯，要攻破科特大門自然唔係想像中咁難啦！ 科特布斯 作客腳軟
客隊方面，贏得拜仁同哈化，備受吹捧都好正常，但要注意係，科特布斯今季一到客場就腳軟，開季踢十二場作客聯賽，只係得六和六負，一場都未贏過，就算計埋對賽成績，近四次交手又係由杜伊贏三次，依家杜伊讓平半，和波頂盡輸半格，認真抵玩。
| 
