| 今晚英超上演「雙紅」矚目大戰，曼聯主場迎戰阿仙奴，「紅魔鬼」上周中歐聯收起C朗同朗尼，擺明車馬將矛頭指向今仗。反觀「兵工廠」歐聯同利物浦搏足九十分鐘，加上隊波兵微將寡，季尾已成強弩之末，今場莊家低開曼聯主Ｗ，證明紅魔真係到飛，值得信賴！（now 632周日晚11時直播）
 阿仙奴成強弩之末
 上周中曼聯歐聯主場迎戰羅馬，主帥費格遜大膽收起朗尼、Ｃ朗同史高斯等主力，派出大量副選落場，陣中二線兵好似夏格維斯及朴智星演出對辦，球隊踢得好生猛，壓住對手狂攻，同出正選根本冇分別。「紅魔鬼」勝在人腳夠多，去到季尾費Sir仍然大把調配空間，淨計呢點已經遠比阿仙奴優勝。 阿仙奴三戰利物浦後成大輸家，歐聯出局，聯賽亦畀曼聯掟甩六分。以目前形勢睇，球隊今場作客奧脫福非勝不可，然而焗攻盞衰多幾錢重。「兵工廠」季尾走晒樣，主要係因為板深度不足，守將沙格拿抖緊，路斯基隨時因傷提早收咧，連中場硬漢法米尼都做埋十字軍，頭雲格手頭上兵源買少見少，再加上法比加斯同尹佩斯都缺態，戰績下滑可以理解。 紅魔後防搞番掂
曼聯早前一度鬧中堅荒，不過，里奧費迪南上場傷愈踢足全場，睇問題唔大。另外，隊長加利尼維利休戰超過一年後終於復出，加上左閘艾拉輕傷好番打得，新仔碧基踢落又有板有眼，後防基本上夠晒人手。至於另一後防傷兵尼曼查維迪據悉歐聯四強首回合可以踢得，到時球隊又可「夫添」上陣。 今場好多莊家睇好「紅魔鬼」贏得，初盤主Ｗ賠率跌破兩倍關口，足足要讓到半球，飛數已經完全反映信心。事實上，曼聯近五次主場對阿仙奴贏四場，今季英格蘭足總盃更以四比○爆「廠」，雖然場大家出部分副選，但奧脫福氣勢確係不同凡響，今場可以放心捧主Ｗ！ | 
