| 打大賽幾時都係最講經驗，問安高押注費格遜定列卡特身上，我一定揀前者。今晚歐聯四強次回合曼聯主場對巴塞隆拿，安高深信「紅魔鬼」返到奧脫福肯定會大變身，擺番個攻擊陣勢，同你搶中場鬥攻，曼聯領隊費Sir老謀深算，肯定恰得住冇晒板斧巴塞練列卡特，今場捧主勝啦！（now670及672台、廣東體育周三凌晨2:45直播） 首回合雙方互交白卷，唔少人都批評曼聯玩死守輸晒形勢，依安高見解，費Sir呢招認真高，試問咁多年，有邊支球隊作客魯營同巴塞鬥攻會有好收場先？唔係講笑，上仗踢右閘夏格維斯、負責追纏巴塞前鋒美斯朴智星，都全場交足貨，就算亨利同伊度奧間中發揮到速度去射門，往往都畀「紅魔鬼」球員逼住，冇乜威脅，今晚曼聯到次回合回師主場出戰，巴塞想入波根本係難過登天。
 C朗搏老命 將功補過
 再者，應屆「英超球員先生」C朗首回合射失十二碼，唔想成為出局罪人，今鋪肯定搏老命，以佢質素同鬥心，配合埋朗尼同泰維斯，呢個進攻組合可以話係無堅不摧。前線掂，後防一樣有好消息傳出，大將尼曼查維迪賽前話可以及時復出，鎮守後防，「紅魔鬼」基本上可以夫添出戰，要贏波點算奢想？ 講埋巴塞呢邊，列卡特個「四三三」短傳戰術畀人睇通睇透，今鋪最多咪擺埋亨利出！安高唔係懷疑亨利實力，但佢同伊度奧實在唔係夾得好，更何況列卡特一直放風，話今場目標係求有比數和波，想靠作客入球晉級，咁冇大志？好易出事！ | 
