| 昔日勁旅華倫西亞今季衰到貼地，晒鑊朗奴高文到今時今日都仲未失業，全因隊波殺到入西班牙盃決賽吊命。呢位荷蘭名將今晚有機會將功贖罪，定必把握良機助球會捧盃。歐協盃出局後散晒基達菲，根本仲未收拾心情，對住人腳同大賽經驗都勝一籌華倫絕對冇甜頭，平手盤撐華倫！（開賽時間：周四凌晨4:00） 自○三至○四年度球季，華倫成為西甲、歐協盃雙料冠軍後，呢幾年一直冇盃落袋。雖然話朗奴高文領軍戰績唔合格，調兵遣將同戰術運用亦遭球迷、甚至自己友祖亞昆批評，但會方日前表明如果成功捧盃，就有額外獎金發放，一眾戰將當然會打醒精神啦！後艾比奧爾仲話，暫時要將聯賽成績擺埋一邊，捧走西盃喜悅足夠覆蓋尷尬聯賽劣績，睇得出呢班蝙蝠兵充滿決心！ 冇錯，基達菲今季表現的確可人，早排聯賽頻頻失分，皆因擺晒成副心機落歐協盃，上周中少踢一人情況下，加時輸作客入球畀拜仁踢出局，認真洩氣。最慘係呢場波後，守將馬里奧、柏保路靴南迪斯、前鋒烏捷都加入十字軍行列，絕對係賠了夫人又折兵。 基達菲傷兵滿營士氣曳
再講，阿根廷守將丹尼爾戴亞斯雖已傷愈，但休息五周後始終冇態，加上隊長比蘭古亞養緊傷，基達菲條防線完全靠唔住，面對來勢洶洶華倫盞送死。 | 
