| 蘇超今晚上演爭標大戰，由些路迪主場惡鬥格拉斯哥流浪。有望成為四冠王流浪，依家帶出四分兼打少兩仗，只要今仗唔輸，奪標呼聲高唱入雲，為踢好今仗，上周末足總盃八強都大玩留力，蓄銳而臨兼有對賽往績支持，些路迪讓平半，我撐下盤！（now825台及無收費電視25台周四凌晨2:45直播） 威過曼聯、皇馬等頂級大球會，流浪今季已經搶先捧走蘇格蘭聯賽盃，依家足總盃又殺入四強，歐協盃四強叫胡，聯賽形勢大好，有望爭做四冠王。領隊禾達史密夫為今戰，周日足總盃眼見對手只係甲組仔巴特里，一口氣作出七個調動，為乜？咪係留力鬥些路迪囉，我有信心，今晚佢做得到坐和望贏，受讓平半至少都執半格。
 些路迪畀流浪食住
睇唔係淨睇一邊，事實上，些路迪今季表現認真麻麻，早輪足總盃出局，領隊史特根帥位已經傳出危危乎，就算話周日佢踢番場爭氣波，聯賽大破第三位馬瑟韋爾，但都付出唔少氣力，最令人擔心係，原來佢近五次對住流浪，只錄得一和四負，未贏過，格食格，我寧願捧對家。 | 
