| 大把貨，使鬼同你搏？法蘭克福今晚德甲主場迎戰拜仁慕尼黑，有權偷雞開出「讓球主勝」，因為佢主場專收強隊，今季對住前五位球隊未輸過，撞拜仁要留力德國盃同歐協盃，依家聯賽又有十分優勢，呢場派二隊撐場，失分係意料中事。（有線61周四凌晨2:00直播） 目前法蘭克福得四十二分，爭踢下屆歐洲賽機會唔大，再加上中堅基傑亞高斯傷埋，表面睇戰意同陣容都冇咩保證。 主場對前五位未輸過
不過唔好忘記，佢今季主場特別惡，面對前五位球隊雲達不來梅、史浩克04、利華古遜同漢堡竟然未輸過，取得三勝一和，我唔相信佢對住拜仁會放軟手腳。 拜仁近期睇落好叻，不過淘汰基達菲同反勝波琴都係踢到倒瀉籮蟹，內部不和問題亦未解決，造訪專同強隊過唔去法蘭克福，真係唔值得睇太高。再講，拜仁本周末就要同多蒙特爭德國盃冠軍，下周中再對辛尼特爭歐協盃決賽席位，練希斯菲特識分輕重，梗係唔會呢場出真功夫啦。 現時拜仁德甲領放十分，基本上大半個冠軍，加埋中場薛羅拔圖停賽，門將簡尼受傷，德國《踢球者》估計，呢場希斯菲特會派二隊出戰，踢慣正選得番雲邦美、盧斯奧同馬素贊臣三個，全隊有八個位置調動過，真正比賽唔係玩Game打「WE11」，咁樣大變陣，輸默契都輸死。 | 
