| 尋日關爺畀條「瑞典超三串一」中，今日提供呢條同樣穩陣又好分。德乙去到尾段，幾支護級球隊鬥心無限，發揮超水準，關爺睇好佢繼續幫到手，其中凱沙羅頓主場鬥冇好爭聖保利，主W被壓到得1.65倍，莊家對佢信心十足，值得照跟。（周二晚11時30分開賽） 德乙只剩三輪，凱沙羅頓僅列尾四，仲差尾五奧芬巴克兩分，如果再唔爭氣前景堪虞。其實呢隊「德國紅魔」之前已經發力，三場聯賽連取七分，只係上仗作客勁旅緬恩斯先僅輸一比二，球員鬥心值得一讚。 呢次凱沙羅頓回歸主場，戰鬥力將會更強。聖保利位列中游，目前大打風流波，而佢一向都不擅作客，近五仗作客輸四場，呢次去到人地頭無謂搞搞震，主W可以信賴。 另一場德乙，包尾柏達邦依家僅得廿七分，比尾四球隊少七分，可謂水浸眼眉，主場鬥歇冬後表現差勁1860慕尼黑，主W要得過。 法足盃方面，巴黎聖日耳門作客乙組艾米恩斯，聖日耳門盃賽表現特醒，客W有2.55倍，可以一試。 | 
