| 今晚德甲快車真正大戰，係排第四漢堡主場迎戰次席雲達不來梅，兩軍都極有戰意，但論狀態不來梅明顯好過對手，而且有往績支持，今場受讓平半好抵玩。漢堡上仗雖破六場不勝困局，但對手只係弱旅羅斯托克，根本不足為據，不來梅近四次作客漢堡兩勝兩和，呢個下盤筍到痹。（有線63台周四凌晨2時直播） 漢堡季初表現唔錯，但後勁不繼，去到季尾出現跌Watt情況，之前六場不勝，睇見都唔開胃，上仗作客羅斯托克終於贏波，但對手實力太弱，故一場勝仗唔足以證明佢已經反彈。今場漢堡繼續有高柏尼同卡斯迪倫養傷，對攻守實力都有影響，睇番本季聯賽戰績，漢堡鬥勁旅成績極曳，鬥拜仁、史浩克04同不來梅都未贏過，呢次實在讓唔起對手。 冇迪亞高芬寧斯都夠殺
不來梅季尾全力衝刺，近五聯賽四勝一和，一共攻入十四球，幾乎每場入三球，成班波已經晒火，狀態正值全季巔峰。雖然今仗中場指揮官迪亞高、芬寧斯缺陣，但上仗冇迪亞高，球隊鬥科特布斯仍然踢得出色，輕取對手二比○。另外，不來梅一向唔驚作客漢堡，近四次正式對賽，不來梅兩勝兩和未輸過，今仗鬥冇態漢堡，受讓好路。 | 
