| 個勢好，當然要食住上！名古屋鯨魚今晚日聯盃A組主場迎戰浦和紅鑽，我撐主勝，原因好簡單，鯨魚剛締造聯賽二百五十場勝利，正式係a士氣返晒，又點會唔想添食？相反紅鑽有七個球員要代表日本踢國際賽，即使想搏都有心無力，隨時扯白旗放棄呢隻盃仔。（開賽時間：周日晚6:00） 目前鯨魚A組三戰得六分排榜首，對家紅鑽就三戰得兩分包尾，邊隊有心機踢日聯盃，真係唔使問阿貴都知道。日本人鍾意搞噱頭，上星期鯨魚聯賽打沉札幌岡薩多，累積二百五十場聯賽勝仗，高層就專登推出特別版紀念Tee搵錢，我認為，鯨魚球員唔會呢個時候流攤同老闆個荷包作對。
 名古屋杉本惠太有料到
 雖然鯨魚有射手科迪莊臣因親人離世返挪威，前鋒玉田圭司、門將楢崎正剛被日本國家隊徵召，同埋後防吉田麻也為日本U23比賽，但其實除吉田，其餘三位球員今季未試過日聯盃踢正選，換句話講，練史杜高域有足夠棋子調動，副選箭頭杉本惠太估計會擔大旗，今季佢有四個入球，唔可以睇小。 紅鑽暫時以較佳得失球差，壓倒同分鯨魚日職排榜首，問題係紅鑽今場有高原直泰、鈴木啟太、阿部勇樹同田中莉王等正選，需要為日本踢麒麟盃，後備力量艾斯古迪路、梅崎司同細貝萌就要日本U23服役，突然失去七個球員，雖則有田中達也傷愈擔正攻堅，紿終人手唔多夠，要由青年隊提拔個十七歲原口元氣戥腳，三線實力難免大跌Watt，紅鑽點能夠創造奇爭出線？輸多場機會大。 | 
