| 歐國盃決賽周殺到埋身，唔少參賽球隊都展開備戰最後衝刺，當中瑞典今晚主場同斯洛文尼亞進行熱身賽，雖然話有主場之利，但由於唔少主力都係歸隊，未必會今晚上陣，小心陰溝翻船，安高寧願博瓣「讓球客勝」好過。（now632台及廣東體育周二凌晨2:00直播） 瑞典國家隊上周四正式進駐集訓營，不過三大主力伊巴謙莫域、柯碧克同卡斯唐一早話明要踢埋上周末球會賽事先歸隊操練，加埋休養回氣，今晚上陣機會微乎其微。特別係伊巴謙莫域，佢冇國米對羅馬意大利盃決賽上陣，反映佢傷勢仲未痊愈，依家養傷大過天，今場波都唔使預佢咯。
 拿臣未必踢足全場
除此之外，重返國家隊軒歷拿臣，雖然狀態一流，但由於尋晚格拉斯哥參與些路迪名宿奧尼尼紀念賽，今晚上陣時間實會受到限制。至於雲達不來梅前鋒羅辛貝治日前操練中受傷，面臨退隊危機，中場龍格保同連達羅夫今仗又話因傷掛免戰牌，個陣咁殘，你估話贏就贏咩！ 斯洛文尼亞世界排名七十四，足足比瑞典二十三名低五十一位，實力當然係有一段距離。不過，球員普遍腳法唔差，陣中仲有兩個外流德國搵食球員飛，漢堡右閘碧高傳送準繩，科隆長人路華高域頭槌出色，歷來為國家隊上陣十八次轟入六球，佢會係瑞典防線心腹大患。 | 
