| 麒麟盃王者之戰今日埼玉2002年體育場開波，東道主日本迎戰巴拉圭，主隊上場贏科特迪瓦，今場即刻勁聚飛，依家要讓半球，個Ｗ唔抵玩！日本頭岡田武史向來係防守大師，加上今場和波都足以捧盃，踢落肯定較保守，捧細盤更佳！（有線足球台61周二下午6時20分直播）
 岡田主帥重防務
 日本主場出擊從不欺場，上周末面對非洲勁旅科特迪瓦，全場佔盡優勢小勝一球，表現討好。休戰三日之後，大和兵團移師埼玉出擊，惹來好多捧場客支持，不過，讓到半球真係過火。巴拉圭比對手抖多兩日，雖然人腳唔齊，但憑體力同整體踢法迎戰唔係輸梗！ 岡田武史再掌日本帥印，麒麟盃係佢上任後考牌戰，可謂志在必得。雖然佢只係上任冇耐，但已被批評戰術太保守，浪費陣中優質進攻球員。不過，日本前線蜀中無大將，王牌射手高原直泰愈踢愈沉，上場箭頭玉田圭司一箭定江山，恐怕亦係曇花一現，所以岡田主帥注重防務係無可厚非。 事實上，日本中堅組合中澤佑二同田中莉王確係有料到，兩位仁兄擁有鬼佬身形，身體對抗性一流，雖然加地亮退出國家隊，但FC東京新星長友佑郁同樣有不俗發揮，右路防守力冇削弱。今場中村俊輔上陣成疑，前線少個指揮官，岡田頭實貫徹保守踢法，務求保持不敗莊捧盃。 雙方前鋒冇貨交
巴拉圭今次東來志在訓練新人，前線老大哥辛達告魯斯同希度華迪斯都冇入選，大軍四個箭頭名不見經傳，上仗踢落冇乜料到，難望攻破主隊大門。兩軍攻力同樣麻麻，今場大手交易機會唔高，主Ｗ1.8倍係好分，但1.68倍細盤更穩！ | 
