| 歐洲足協盃八強首回合賽事，費倫天拿主場對燕豪芬；基於兩隊實力接近，令勝負相當難測。以雙方近期走勢以及打法分析，預料今場入球數字唔會多，「細盤」係巨高心水推介。（有線足球台61周五凌晨2時45分直播） 費倫天拿近三場比賽取得一勝兩負，而呢三場比賽都有一個特色，就係費倫天拿每場只入一球。費倫天拿一向都係擅攻球隊，練柏蘭迪利亦承認進攻係佢對足球主要理念，奈何近期費倫天拿有心無力，入球數字少得可憐。其中一個原因係梅度狀態尚未回復；呢位羅馬尼亞國腳早前受過傷患困擾而休息四個星期，成個月冇正式比賽，狀態回落都好正常。第二點係柏仙尼腳風欠順，攻門中楣中柱撻Q鏡頭多的是，黑氣纏身射極都唔入。費倫天拿兩名主攻手都「啞火」，試問點樣撕破燕豪芬防線。 燕豪芬返主場再搏過
燕豪芬十六強淘汰熱刺出局，而印象最深刻係次回合，燕豪芬全程死守抵擋熱刺攻勢。雖然臨尾階段都要失守，但燕豪芬防守表現絕對唔差，後防密到插針都唔入，如果唔係比賽末段冇氣，熱刺未必入到波。今場作客費倫天拿，燕豪芬好大機會採取死守策略，等到次回合返主場先解決對手。燕豪芬唔肯主攻，費倫天拿攻力又唔夠，今場入球數字偏低可以預期。
| 
