| ESPN同視體育台獨家直播歐聯八強首回合淘汰賽，英超雙雄冤家路窄，利物浦季尾狀態明顯較阿仙奴優勝，作客有力保不敗。費倫巴治出名主場夠惡，車路士去到土耳其地獄球場好難為所欲為。 近九場贏八場利物浦表現好穩定，對曼聯輸波亦只不過係因為大半場時間踢少個人，打戰為留力勒住係咁意僅勝愛華頓，所以有充足體力作客兵工廠。自從奧雲離隊之後，利物浦鋒線一直缺少一個能夠穩定入波超級射手，經過幾年尋找，托利斯終於解決紅軍鋒力唔夠問題，佢依家已經入二十八球，更何況絕大部分都係「生波」唔係死球，第一季踢英超就有咁好表現認真唔簡單，勢必成為兵工廠心腹大患。 車仔難勝費倫巴治
雖然阿仙奴上演一場經典逆轉砌低保頓，但係對住唔識入波降班膽都要贏得咁辛苦，仲要失兩球添，加上大半場踢少個仲要去盡，兵工廠情況都幾令人擔心，畀紅軍作客有機會一搔七年之癢。 至於爆冷入八強費倫巴治近況其實唔錯，呢屆歐聯主場全勝，贏過國米同西維爾，所以唔好以為佢一定會死守，話唔定殺個措手不及。事關車仔作客謹慎，對住硬橋硬馬奧林比亞高斯同史浩克都摸和食白果，呢場又會陷於苦戰。
| 
