| 阿仙奴三鬥利物浦，由今晚歐聯八強首回合揭開序幕！雖話阿仙奴近年主場剋死紅軍，不過兵工廠近期明顯跌Watt，相反利物浦係「變形金剛」，打歐聯特醒，加上費托同史卡迪爾呢對一前一後孖寶愈踢愈弗，有力助紅軍首回合立不敗之地，受讓平半要下盤！（now670台及廣東體育周四凌晨2:45直播） 阿仙奴即將進行魔鬼賽程，英超加歐聯連續三場對利物浦，之後再對曼聯，非常難啃。今晚會係兩隊歷來第二百次交手，阿仙奴雖有近八次主場對利記不敗紀錄支持，不過兵工廠早前連續五場聯賽失分，就算上場聯賽擊敗保頓重響勝鼓，亦一度落後兩球，證明後防有隱憂。 阿仙奴後防變陣唔穩
其實阿仙奴今季防守一直做得唔錯，可惜沙格拿前仗對車路士重傷，賽後證實抖三周，後防被迫變陣，結果上場即失兩球，預期阿仙奴今戰防線仍會出現唔少甩漏。仲有一點值得留意，阿仙奴目前聯賽仲要力求爭標，相反利物浦聯賽只求第四，何況上場聯賽已經擊敗最大對手愛華頓，球員歐聯自然冇咁綁手綁腳。 阿仙奴中場基拔圖施華賽前提醒隊友，要留意利物浦係「變形金剛」，打聯賽同歐聯判若兩隊，朱楓非常認同呢一點，事實上，紅軍近三年聯賽一無所獲，偏偏卻兩度打入歐聯決賽，○五年更成功捧盃，經驗贏晒，加上費蘭度托利斯近況大勇，而中堅史卡迪爾上場對愛華頓亦表現得一夫當關，有呢兩大弗將助陣，朱楓認為紅軍絕對有力阿仙奴主場立於不敗之地，下盤值博。 | 
