| 正所謂知己知彼，百戰百勝！被視為歐協盃奪標大熱拜仁慕尼黑，今晚八強首回合主場迎戰西班牙基達菲，除話實力高出一線之外，賽前仲派出「密探」列貝利搵佢班西甲老友料協助部署，連埋首席射手東尼復出，主場大炒機會高，「讓球主勝」抵玩。（有線62及廣東體育周五凌晨2:45直播） 拜仁德甲幾乎穩奪冠軍，依家最想自然係贏埋歐協盃向擁躉交代，今晚佢遇上基達菲只能算係西甲二線波，同拜仁實力應該有一段距離，不過為免夜長夢多，首回合主場出戰，肯定想「省」多幾粒增加晉級優勢。 基達菲兩連敗輸信心
事實上，拜仁今仗求勝決心有幾強，從佢陣中主力列貝利舉動就可知一二，呢位法國球星上周中踢國際賽時，竟然捉住國家隊隊友杜林同亨利料，問佢有關基達菲係乜料？事後列貝利話知道基達菲打法特色，亦都深知佢主場夠惡，所以已經同練希斯菲特傾掂，今晚會搶攻博入多幾粒。 陣容方面，拜仁今仗會有射手東尼波監刑滿復出，反而基達菲會有主力後列捷特停賽，此消彼長，更容易造就拜仁大捷。再者，經已同時殺入西班牙盃決賽客隊，近排明顯聯賽留力，打算專心盃賽爭勝，不過，聯賽兩連敗連一個波都入唔到，安高反而擔心會對球員信心有影響，今次作客拜仁，你估真係話撻就可以撻番咩？ 歐協盃賽制
歐協盃淘汰賽採主客兩回合制，今輪為八強首回合賽事，若兩回合總比數賽和，以作客入球較多一方為勝；若作客入球數字相同，則在次回合九十分鐘後加時三十分鐘；若雙方在加時取得相同數量的入球，由作客球隊獲勝；若加時沒有入球，則以互射十二碼分勝負。
| 
