| 歐聯今晚安排一場早場，G組莫斯科中央陸軍主場對燕豪芬，燕豪芬依家被逼到懸崖邊，如果想出線，今仗除贏波外別無選擇，背水一戰下，面對已出局中央陸軍，實搏埋最後一啖氣，難得今場仲有得受讓，Mic少要燕豪芬下盤。（now 670周三凌晨1時30分直播） 燕豪芬依家落後第二位費倫巴治四分，由於對賽成績唔及對方，因此如果今場失分，就肯定無緣出線。費倫巴治同日作客國米，失分機會甚高，燕豪芬今場全取三分將可大大拉近雙方距離，今場成為燕豪芬能否出線最關鍵之戰，今場唔搏，仲等幾時？而燕豪芬今季分組賽唯一勝仗，就係擊敗中央陸軍，對球員信心有幫助，大有機會重溫美夢。 中央陸軍風流波讓唔起
另外，燕豪芬已走出前練朗奴高文突然離隊陰影，上仗荷甲聯賽大破精英隊，取得近四仗首場勝利，有利振奮軍心，最難得係首循環射入中央陸軍大門拿索域及堅尼夫佩雷斯上仗聯賽都有波入，似乎係一個好兆頭。 至於莫斯科中央陸軍依家只可以爭小組第三位，打歐洲足協盃，但足協盃一向欠缺吸引力，中央陸軍係咪咁有心去爭，實在令人懷疑，讓波實在太牙煙。 | 
