| 「紅魔鬼」曼聯近期勢如破竹，今晚英超作客米杜士堡，相信大部分人都唔會懷疑佢三分能力，不過和仔就要提一提大家，米杜士堡河畔球場近年專門用打大老虎。曼聯依家雖然狀態巔峰，但歐聯戰線始終虛耗能量，好難要求佢再場場大炒對手，今場博曼聯小勝開「讓球和」。（now632台周日晚8:30直播） 米杜士堡雖然只係下游球隊，但亦製造出唔少經典爆冷比賽，尤其河畔球場出賽成為各支勁旅噩夢。睇番米杜士堡近三季聯賽主場十一次對住「Big4」球隊，竟然錄得五勝四和二負超卓戰績（見打虎表），今季就曾經打破阿仙奴不敗身。米堡自從今年元旦日之後，聯賽從未試過輸波多過一球，想炒佢唔係想像中咁易。
名家搵食攻略
米堡冇爭 踢得放
其實米杜士堡依家雖然冇乜特別目標，但呢班球員冇包袱下反而有更好表現，上場作客雖然輸畀車路士，但有睇波球迷都知道佢只係輸運，如果唔係三度中柱中楣，絕對可以令車仔失分，巴西射手艾方素亦都開始上力，端基同艾利亞迪尼近排狀態亦唔錯，相信曼聯後防都會忌憚呢幾位射手。 曼聯C朗、朗尼狀態無人能及，不過佢始終都係凡人唔係神仙，周中先至飛去意大利踢歐聯，踢埋今仗之後，又有連對羅馬同阿仙奴兩場硬仗，就算費格遜下令班球員勒住踢都係人之常情。何況中堅主力尼曼查維迪有傷，就算有加利仔復出或可後備登場，問題係防守始終冇早排咁穩陣，作客小勝機會最大
| 
