論意大利球壇近年最具爭議性球員，Mic少立即諗起卡斯辛奴，呢位前鋒同傳統意大利球星靚仔形象相反，甚至稱得上其貌不揚，有時火爆、失常舉動，更令人有生人勿近感覺。但其實卡斯辛奴係一位內心充滿「火」鬥士，佢今晚坐完波監復出，勢必如猛虎出柙，一於趁機捧森多利亞主勝。
一提起卡斯辛奴，總會冠予佢「壞孩子」等負面稱號，加上外貌唔討好，更加神憎鬼厭，連近兩任意大利國家隊領隊納比同鄧納東尼都怕佢。不過只要細心了解呢位惹火人物，其實佢對足球熱誠同執，唔比任何世界級球星低。
浪子復出痛擊利禾奴 浪子回頭金不換，卡斯辛奴今季重返意甲後，表現愈來愈醒神，帶起森多利亞，球隊距離取得歐洲賽資格已經好近，今晚主場對利禾奴，齊三分機會高。
