| 今日係歐洲轉番夏令時間第一個周末，意味住歐洲各大聯賽都提早一粒鐘開賽，亦即係話各位愛睇波兄弟姊妹以後又有覺好，至少我BA有多一個鐘頭時間休息，熊貓眼出現機會都細！ 提到紐倫堡，會諗起○四年幫希臘爆冷捧走歐洲國家盃查列斯迪斯；諗起希臘，會聯想到小島上一間間沿海邊建築、藍窗框浪漫小白屋。^.^ 雖然未有機會親身遊歷呢個夢幻之都，不過睇見查列斯迪斯今季聯賽表現，我相信希臘唔係每樣都好似神話咁永不滅，紐倫堡今日德甲作客法蘭克福夢想搶分？睇怕願望唔能夠成真！ 季前查列斯迪斯以二千六百八十萬港元加盟紐倫堡，貴為球會史上最昂貴收購，呢位希臘柱躉中鋒經過二十六周聯賽只得四球進帳，想話靠前線隊友？數數手指，較多人識而又幫到手都係得米斯莫域同文度，年初簽下三十五歲射手真高拿始終年事已高，連仗冇波入，表現有心無力，破關乏人後防又唔穩，難怪紐倫堡暫聯賽榜敬陪末席正值垂死掙扎，今日對住三連勝法蘭克福似乎又劫數難逃。 感謝老友早前送藍天使音樂擺設，相信「天使」有守護之意，但凡事或有例外，因為名字叫Angelos（天使）被國人封為「希臘天使」查列斯迪斯，今季睇無力打救紐倫堡再創神話。 | 
