| 最近好多球員都同AC米蘭扯上關係，好似朗拿甸奴咁，佢經理人就畀記者影到佢同AC高層加利安尼食飯。前AC球星舒夫真高又話科木買屋，準備重返意甲球壇。咁多球星都話去米蘭，睇AC重建工程已經展開。話晒都係世界冠軍球隊，點可以再衰畀人睇，今晚AC主場對卡利亞里，「紅黑兵團」有卡卡復出，攻力大增下可大炒番場，「讓球主勝」值得捧場。（now 633周日凌晨2時30分直播） AC積分榜排第六，與第四位費倫天拿相差四分，如果再唔努力，下季就冇得踢歐聯。球員及練安察洛堤都明白形勢不利，今場點都唔會懶懶閒，鬥志一定冇問題。加上球隊已經連續兩仗主場聯賽輸波，求勝心一定非常熾熱。 另外，卡卡復出亦對球隊攻力有好大幫助，上周AC主場輸畀阿特蘭大，前面得個柏圖走來走去，根本威脅唔到阿特蘭大後防。今次有番卡卡幫手，相信會為柏圖製造更多空位，入球機會自然提高。後防尼斯達停賽影響唔大，事關馬甸尼愈老愈可愛，絕對信得過。 卡利亞里作客必反
卡利亞里近期打出一條「主場捧作客反」攤路，好多名家包括樂比及Mic少都追住呢條路捧場，真係收錢收到手軟。今次卡利亞里作客，鍾意跟路買朋友一定識得反佢。另外再睇埋數據及往績，卡利亞里都係處於下風，今次隨時畀AC大炒。
| 
