| 皇馬今季歐聯十六強慘被淘汰，西班牙盃又早早出局，西甲雖然已將宿敵巴塞隆拿拋開七分，不過又要提防落後六分、暫居聯賽第二位維拉利爾從後殺上。為免夜長夢多，今日作客馬略卡爭勝目標清晰，贏波三分應該冇問題！（有線61周日凌晨4:00直播） 往績贏馬略卡成條街
「銀河艦隊」今季西班牙盃兩次對馬略卡都輸波，算係球會恥辱之一，不過如果唔計盃賽話，皇馬聯賽對馬略卡近年可謂贏成條街，最近七次對陣贏足六次，心理上始終佔有一定優勢。更重要係上星期主場對西維爾，落後一球情況下，仍能夠不慌不忙後上反勝三比一，信心返晒！ 皇馬前線雖續有荷蘭籍射手雲尼斯達萊養傷，幸「西班牙金童」魯爾最近狀態弗到不得了，今日由佢帶領攻堅，絕對可以畀到馬略卡極大壓力，要報回盃賽兩敗之仇話咁易。 反觀暫列聯賽第九位馬略卡，既唔使擔心降班，又好難爭到更前位置參加歐洲賽，搶分目標同決心明顯及唔上皇馬，雖然球隊最近四周聯賽贏足三場狀態好似唔錯，但大炒華倫西亞明顯因為對手放鬆兼排怪陣所致，主場贏拉科魯尼亞同維爾瓦，對手實力始終只屬中下游。畢竟近五次聯賽主場對賽輸足四次，今日對住來勢洶洶、三分志在必得皇馬，試問點頂得住？ 頂『占』筍盤 ‧皇馬：客勝
| 
