| 一連三場阿仙奴、利物浦大戰，今晚就會上演第二Round賽事，地點繼續係阿仙奴阿聯酋航空球場，只係背景就由歐聯變成英超。兩隊周中歐聯踢成一比一平手，阿仙奴表現無疑較好，聯賽鬥心亦都肯定高過「紅軍」，不過「兵工廠」近期十分運滯，而紅軍作客鋒力亦都有隱憂，今場博1.6倍「入球細」！（now632台周六晚7:45直播） 阿仙奴依家處於一個兩難局面，聯賽落後曼聯六分「吊鹽水」，想放棄又唔係，想搏殺又要顧慮歐聯戰線，下周中佢就要作客晏菲路踢歐聯八強生死戰，雲格點樣分配資源將係關鍵。無疑阿仙奴主場氣勢好強，過去九次主場迎戰利物浦更有六勝三和不敗成績，周中場歐聯更加住對手打，可惜淨係得個勢，攻極都攻唔入，「運氣」呢兩個字似乎已經一段時間同阿仙奴扯唔上關係，唔到你唔信。
名家搵食攻略
賓特拿冇運 難入波
好似荷蘭前鋒尹佩斯咁，復出冇耐，上場又再一次受傷提早退下火線，雖然情況唔算嚴重，但係今場未必趕得切復出，而且雲格極有可能會再畀艾迪巴約先做後備，留力歐聯次回合賽事，咁環境底下，今場好大機會由上仗幫紅軍「護空門」賓特拿掛帥，唔計佢級數，淨睇運氣，賓特拿確實堪稱「黑仔王」，由佢坐鎮鋒線，和仔相信阿仙奴今場入波一定唔會多！ 費托作客 威力大減
咁利物浦又點呢？佢上星期贏出「打戰」後，聯賽第四呢個目標已經好穩陣，領隊賓尼迪斯話明會收起部分主力，今仗用番周中死守策略博一分亦未嘗不可，而且「紅軍」神射手費蘭度托利斯作客演出亦係一大隱憂，呢位西班牙前鋒今季聯賽二十一個入波中，竟然只得兩個係作客入波，利物浦要攻破阿仙奴大門唔多樂觀，中場馬斯真蘭奴尋日亦被足總加監兩場，今晚無緣披甲，今場勝負可能靠一、兩個入球決定。 | 
