正所謂東家唔打打西家，近排我有個朋友佢間公司做得唔開心，諗住跳槽咁話，仲問我意見，我話如果想有新發展同新衝擊，轉工都係一個好選擇，淨係睇漢堡前鋒荷西古里路，前季拜仁鬱鬱不得志，上季去到漢堡開始重生，今季表現突出，仲贏得唔少球迷讚賞添！
以前睇拜仁，成日見到個男仔黑黑實實，後備上陣都踢得唔錯，不過始終踢唔到正選。後尾先知原來呢個叫荷西古里路秘魯前鋒，係因為球隊太多有實力球員，成日要打後備，真係冇陰功。
到上季佢終於離隊博一博，走去漢堡搵食，經過一季磨練，今季就愈踢愈好，仲已經有六個入波添！有衝勁、有鬥志，仲有射術，漢堡有佢打前鋒，今晚對住史特加，我信佢唔會輸，受讓梗係支持下盤啦！
