| 西甲已經鬥到入直路，巴塞隆拿接連失分後，除跌落第三之外，仲差榜首皇馬七分之多，要爭標根本再冇失分空間。今晚巴塞面對基達菲，細鬼睇好主隊贏波之外，仲可以贏兩球以上，始終基達菲眼前，最重要都係兩項盃賽，踢聯賽肯定冇咁肉緊。（有線足球台61周一凌晨3時直播） 巴塞近五場聯賽一勝一和三負，上盤客叫苦連天，兼有內部危機，練列卡特傳被「炒魷」，朗拿甸奴同球會關係一再惡化，間接影響球隊部署及運作。 「細哨」再傷唔使煩
不過，列卡特今周再一次發表聲明，唔會離開球隊，而朗拿甸奴亦證實再度受傷，要提早收咧。細鬼認為實屬好事，皆因出唔出「細哨」問題已經纏擾巴塞很久，加上佢狀態未弗，冇佢仲好。正如森保達賽前所講，巴塞並非只為歐聯，球隊上下都係向雙料冠軍進發，所以聯賽唔單只搏命，仲希望入多兩球，挽回近期面子。 基達菲志在足協盃
相反，餘下聯賽對基達菲講，只係雞肋。現時西維爾、愛斯賓奴及馬德里體育會等都正在爭奪歐洲賽資格，若基達菲想爭埋一份，相信比爭兩項盃賽更難，今場好大機會被巴塞宰割。基達菲將要接連出戰足協盃及西班牙盃，真係諗唔到理由佢會搏今場。
| 
