日前羅馬歐聯主場兩球輸畀曼聯，我冇晒心機，非常咁抑鬱。相信羅馬一班球員都係「謝晒」，今晚對住熱拿亞，恐怕又要受到考驗。真係慘！
托迪繼續養傷，阿古蘭尼又可能因傷缺陣，大比沙路要停賽，羅馬呢排都可謂禍不單行。至於熱拿亞最近就兩連勝，首席射手波里路上場又有入波。波里路今季演出優異，暫居意甲射手榜榜首。呢位前AC米蘭青年軍出身、曾因禁藥事件停賽前鋒，一路以都幾多波折，依家可以話係為自己爭番啖氣，今晚將會係羅馬後防心腹大患！
想羅馬歐聯晉級，依家根本係「不可能的任務」。但「不可能的任務」都有成功例子，好似上周阿仙奴作客保頓，踢少個、落後兩球仍可反敗為勝，我惟有咁樣安慰自己，「自欺」就冇咁唔開心囉！
