| 衰開有條路，西甲班霸皇家馬德里近排唔知撞咩邪，近八場聯賽輸五場之多，球員信心受影響，練舒斯達又成日傳出離隊傳聞，仲點專心踢波？好衰唔衰，今晚佢仲要遇上剋星西維爾，近年對賽輸多贏少，皇馬要讓波，安高寧願捧「讓球客勝」。（有線61、廣東體育及中央5台周一凌晨3:00直播） 雖然話皇馬依家聯賽榜領先次席巴塞隆拿四分，但想封王根本未算穩陣，今晚落場又點會唔搏命先，之但係安高最擔心係佢想贏都係有心無力，事關皇馬近排演出衰到爆燈，齋計聯賽就近八場輸五場，如果連埋歐聯計，仲要係近十場輸七場添，咁狀態，有主場之利都咪當佢係寶。
雲佬打柴皇馬一沉不起
事實上，自從射手雲尼斯達萊受傷，羅賓奴狀態回落之後，皇馬前鋒線就只係得番魯爾值得信賴，但單天又點保至尊，上仗魯爾梅開二度都頂唔住，主場輸畀已經今非昔比華倫二比三，最慘係連主場氣勢都冇埋，點捧得過先？ 簡Sir飛西維爾火力勁
另邊廂西維爾，上周末主場輸畀馬德里體育會雖然失威，但其實近四戰佢都贏出三場，證明狀態唔會太曳。今晚佢話就話有中場馬利斯卡停賽，但隊波仲有大把人選替補，實力冇削弱到，加上前線仲會有捷雲頓傷愈隨時候命，同時又有路爾斯法比安奴同「簡Sir」簡路迪飛，要撕開皇馬條出名豆腐防線，都唔係太難。 仲有一點值得安高睇好，就係兩班波近六次交手，西維爾竟然贏出五次之多，話佢係皇馬剋星都絕不為過，今鋪受讓出戰，唔好話望佢贏，和都可以笑住收錢啦！ | 
