| 歐聯出局，AC米蘭今季餘下目標，當然係力爭下屆歐聯資格，今晚主場對阿特蘭大，狀態大勇柏圖帶領下，贏波應該冇問題；只係考慮AC今季主場入球數字偏低，贏波隨時一球上落，3.55倍「讓球和」有得諗！（now634台周日晚9:00直播） 阿特蘭大死守輸少當贏
AC米蘭目前落後費倫天拿四分排第五，若想出席下屆歐聯，餘下賽事可謂不容有失。雖然AC今場有卡卡養傷，基拿甸奴及派路因流感同踢完國際賽好大機會缺陣，攻擊力大幅削弱，不過好彩仲有熱身賽為巴西處子上陣即有波入柏圖撐場，只係考慮AC今季十四場主場入得十六球，平均每場入一球多，靠柏圖神來之筆要贏一粒應該唔係問題，若然仲想大勝話，就絕對唔易。 對家阿特蘭大今仗有後卡路斯利停賽，中場哥斯天拿同後比連尼亦未傷愈，之不過佢勝在有自知之明，今季對住祖雲達斯、國際米蘭同羅馬三大勁旅都採取死守戰術，所以每次都只係僅輸一球，今鋪對住AC，分分鐘照辦煮碗，既然係咁，一於博AC整多煲魚生粥，3.55倍「讓球和」抵玩！ | 
