| 不得不承認，賽前知道托迪缺陣，的確動搖我支持羅馬信心，但諗深一層，羅馬仲有胡仙歷壓陣，加上「雌狼」歐聯主場已兩年不敗；對家曼聯有作客意大利驚恐症，加上陣中五將傳出有傷，上陣成疑，仲有C朗同朗尼兩大主力雨戰中焗踢全場，體力消耗極大，平手盤撐羅馬，可立不敗之地！（now670台及廣東體育周三凌晨2:45直播） 羅馬上屆八強首回合主場贏曼聯二比一，點知次回合以一比七大敗出局，今年兩隊歐聯分組賽再碰頭，估唔到到八強又再見面，認真冤家路窄。相比起上屆，羅馬今屆表現穩定得多，至少分組賽作客曼聯都係僅輸一粒，十六強更兩勝皇馬出線。
 羅馬近11仗主場贏晒
羅馬今場最大優勢當然係主場出戰，自從上屆重返歐聯戰場後，羅馬主場未嘗一敗，錄得六勝三和，如果計埋聯賽同盃賽，羅馬最近十一場主場更全部勝出。隊長托迪拉傷左腳大腿肌肉今場缺陣，但朱楓認為唔需要太過擔心，事關托迪今季歐聯入過一球咁大把，相反頂替佢胡仙歷卻入四球，上屆羅馬主場贏曼聯，胡仙歷亦有波入，簡直係羅馬「幸運童子」；至於柏路達停賽，就更加冇問題，羅馬出名呢個位人多，迪羅斯、阿古蘭尼甚至大比沙路都有足夠實力頂替。 曼聯「雙朗」踢到
曼聯今屆分組賽以首名出線，十六強擊敗里昂晉級，聯賽方面亦愈戰愈勇，上場聯賽以四比○屠宰維拉，可惜代價甚大，卡域克、里奧費迪南、艾拉因傷下半場退下火線，搞到C朗同朗尼兩大王牌要雨戰中焗踢全場，都咪話唔，而傑斯同雲達沙賽前亦傳出有傷，連埋上述三位仁兄，曼聯今場足足有五大主力上陣成疑，最慘係曼聯歷來十四次作客意球會輸十次，紅魔想出線？睇怕都要好似上屆咁，等次回合返奧脫福先有計！ | 
