| 驟眼望埋去法甲積分榜，摩納哥對雷恩只係一場中游對決，但其實兩軍狀態各走極端。摩納哥自一月底開始未贏過波，前鋒又突然死晒火，就算今晚有主場之利，對住表現漸入佳境雷恩亦惡唔出樣，雷恩受讓平半打和都有錢收，「下盤」捧得過！（開賽時間：周二凌晨1:00） 由列卡度高美斯領軍摩納哥，已經連續八場聯賽失分，最近更錄得三連敗。無疑佢最近賽程係惡啃，接連面對南錫同里昂呢前列分子，但上仗對住卡昂都要輸一比四，咁戰績又真係好難同球迷交代。最慘係新進法國國腳文尼斯上個月底就因傷提早收咧，老將真高拿亦已離隊他投，仲有個比基安尼就連續九仗食白果，攻擊力絕對靠唔住。
 摩納哥近4仗主場零入球
 對手雷恩今季一度被捲入降班漩渦，不過呢排就愈戰愈勇，近五仗錄得三勝二和佳績。雖然後洛芬尼提早收咧，中場尼莫利又上陣成疑，但好彩有法國新星兼球隊首席射手拜恩特撐場，雷恩鋒力唔使懷疑。 最重要，係呢間西北部球會近四次造訪摩納哥取得三勝，雖然話今季客場表現唔算標青，之不過摩納哥近四場主場賽事勁失分不特止，當中仲要係零入球，撞正近五仗只失兩球，由彼德漢臣同文沙領軍雷恩防線，想入波唔係咁易，所以今場捧雷恩「下盤」之餘，入球「細」亦要兼顧。 | 
