| 今晚仍然有國際熱身賽進行，意大利於主場對比利時。自○七年起，意大利從未主場落敗，當中包括熱身賽以及歐國盃外圍賽。而今次安排費倫天拿法蘭基球場比賽，對於意大利國家隊更加有利。第一係國家隊訓練場就位處佛羅倫斯，球員免除舟車之苦。第二意軍上次曾「翡冷翠」大炒德國四比一，可謂福地。意大利實力地利都贏晒，今場好有機會輕取實力一般比利時，預計「讓球主勝」可順利開出。（now 632周六凌晨2時50分直播） 
其實意大利足總大可將今場熱身賽安排米蘭或羅馬市進行，但今次卻特登揀佛羅倫斯，就係貪當地球迷夠晒熱情，全場四萬幾球迷吶喊助威之下，對於意大利整體發揮必有正面幫助。
另外，因意大利於歐國盃十六強被抽入死亡Ｃ組，故此賽前準備絕不能馬虎，預期「藍衣兵團」必定會全力出擊，務求催谷起最佳狀態迎接大戰來臨。以領隊鄧納東尼近幾場慣性，今次仍會排出較進取四三三陣式。前鋒除東尼配搭迪拿達利不變外，右前鋒好有機會用上卡斯辛奴。而呢個二十五歲前鋒隨時係今場主隊取勝關鍵。 卡斯辛奴要證明自己 自從呢個壞孩子重返意大利之後，表現搶鏡到不得了。鄧納東尼早就講到明會畀機會佢落場顯示實力，賽前就連東尼及森保達都大讚呢位天才有料到。睇卡斯辛奴今場熱身賽一定會搏到盡，唔單只要證明自己有資格踢國家隊，仲要令恩沙基明白點解鄧納東尼選我唔選你。卡斯辛奴擺到明要做意國英雄，比利時想阻佢都幾難。 | 
