| 球迷有好多種，忠心型無論愛隊成績好壞都會默默支持，現實型會吼緊邊隊波成績突出就自動過檔。但最差要算係累街坊型，佢往往借支持愛隊之名亂咁搞事，偏偏後果就要由球隊承擔！巴黎聖日耳門正正有唔少呢類支持者，佢仲搞到愛隊冇得玩下屆法國聯賽盃添！ 作為今屆法國聯賽盃得主，巴黎聖日耳門竟然無法來屆冕，聽落實在諷刺，但歸根究柢都係畀累街坊型球迷所害！事緣決賽當日，聖日耳門球迷組織Boulogne Boys下半場展示一條二十五米長，內容係大鬧對手朗斯球迷係「孌童癖」同「失業者」橫額，事發後，巴黎聖日耳門即被賽會禁止出戰下屆聯賽盃，搞事Boulogne Boys亦被政府下令解散！ 其實聖日耳門過去亦試過被累街坊型球迷困擾，早○六年歐協盃，班波因為主場輸畀以色列特拉維夫夏普爾，賽後竟然發生一百五十名主隊支持者「圍」一個以色列球迷事件。既然依家都解決唔到呢個問題，恐怕球會管理層都無晒辦法，惟有希望球隊今季唔好降班，否則成個巴黎隨時畀呢班爛仔球迷反轉都似！ | 
