| 韋斯咸同曼聯有仇？呢隊「錘仔兵」過去曾經兩度爭標關鍵時刻，搞到曼聯失分兼失落聯賽錦標（見事件簿），依家曼聯同車路士同分仲剩兩場，邊隊失分都可能會失埋冠軍，曼聯今仗主場出擊仲點會有保留？冇錯，曼聯近排聯賽失分頻頻，但好大原因係球隊分散兵力打歐聯，依家入決賽自然集中火力，今場可望見番最強「紅魔鬼」。 韋斯咸風流波要「報恩」
今場賽前仲有唔少好消息傳出，曼聯一前一後主將朗尼同尼曼查維迪，缺陣歐聯後終於可以復出，加上上場受傷左閘艾拉亦證實冇乜大礙，可以齊齊披甲，曼聯「夫添」上陣更加畀到人信心啦！雖然曼聯近三次對韋斯咸竟然輸晒，不過其中兩場係作客，另外仗主場輸波就係上季煞科戰，當時已經封王曼聯明顯放水，輸波唔可以作準，而且韋斯咸場贏波成功護級，今場可能「知恩圖報」添！ 韋斯咸依家排第十位，已經肯定追唔到第九曼城，亦都拋離第十一位熱刺五分，想話爭取較高排名丁點戰意都冇埋。原本已經成棚傷兵韋斯咸，最近仲有龍格保提早收咧，近期一班後備軍同青年軍展現水平點同曼聯相比？韋斯咸做過兩次曼聯攔路虎，但係今次睇怕要本利歸還，讓球盤開到兩球只係證明大家對曼聯有信心，「主勝」唔怕撐。 | 
