| 英超去到最後階段，爭標組同護級組形勢分明，大家揀波，好自然會押注於有鬥心、有目標球隊。但是日曼聯鬥韋斯咸，以及富咸鬥伯明翰，Peter就覺得只宜觀望，不宜落注。反而阿士東維拉先係全日投注重心，佢上仗鬥愛華頓表現極佳，呢次主場鬥韋根，主Ｗ值得信賴。 布力般Ｗ雷丁和有計
好多人都話韋斯咸今晚會報恩輸畀曼聯，因為上季紅魔鬼放六分畀「錘仔」，直接幫助後者護級成功。不過落到場比賽好難講，好多都唔係一廂情願，就算最後曼聯真係贏，主Ｗ賠率都奀過鬼，所以不如唔好掂。而富咸主場對伯明翰，兩軍都有鬥心，戰果難以預測，所以都係睇波算。今晚除維拉Ｗ好路外，布力般流浪主場鬥打比郡好難唔贏，而雷丁主場對熱刺，前者為護級有鬥心，後者實力又較佳，好大機會打和。 歐聯準決賽四場大戰打完，Peter有幸全部均作現場評述，真係連汁都撈埋。雖然當中入球唔多，曼聯鬥巴塞隆拿兩回合只有一個入球，鍾意刺激朋友可能會覺得失望，但去到關鍵場合，佢係為入決賽而戰，所以唔使旨意佢踢進攻足球。要冠軍，就必須做好防守，盲目進攻不理防務等同自殺。曼聯一向攻力極強，但鬥巴塞都要集中防守，其中布朗、朴智星都打出身價，而史高斯射入奠勝球亦值得一讚。 | 
