| 英超殺入最後兩輪賽事，護級前途可謂生死一線間，兩支危在旦夕魚腩富咸同伯明翰今晚將會進行生死戰，其中富咸難得及時回勇，又要有主場之利，要挫敗唔識作客伯明翰冇難度，富咸小讓平半，上盤捧得過！（now632台周六晚10:00直播）
 伯明翰作客勁輸波
講實力，本來兩班波都係半斤八，否則大家都唔會仲降班邊緣，不過講近況，近三場贏番兩場富咸，點睇都應該好過伯明翰多少，淨係睇富咸上星期半場落後曼城兩粒，最尾竟然可以反勝三比二，球員決心同狀態都唔係講笑。相反，伯明翰對住隊半力出擊利物浦，竟然係咧住兩球下都畀人追得番，唔見兩分之餘，士氣都肯定跌入谷底。 家陣形勢，富咸排尾二少過尾三伯明翰兩分，一來一回六分波，大家都肯定會搏命，只不過搏還搏，安高最驚係伯明翰想搏都有心無力，事關佢近十一場作客波係得兩和九負，冇地利根本同唔識踢波冇乜分別，仲點樣頂得住富咸先？ | 
