力奇手風轉順，上周日兩場鬼盤中晒，兼夾擂台護級成功，今晚梗係想乘勝追擊啦！今晚捉鬼敢死隊到西甲同法甲搵食，揀係薩拉戈薩同朗斯兩個主勝。
先講場西甲波，薩拉戈薩呢隊衰波今季都累唔少人輸錢，皆因佢人腳唔差，但就戰績勁差，我都中過幾次招。不過，今晚呢個鬼盤格局又真係幾吸引人，首先，呢班波近態有多少復甦象，近三場得一勝兩和，其次對手拉科五連勝兼有得爭歐協席位，都係主隊讓波，又係唔正路！至於話關鍵一點，就係薩拉戈薩依家深陷降班漩渦，再唔贏波真係唔得掂，玩「讓球主勝」就驚難度高，但主勝應該都有得諗。
另一場法甲朗斯對摩納哥，主場朗斯雖然近況麻麻，但客隊始終係風流波，未必頂得住想搶分護級主隊，都係捧主勝數！
