| 英甲今晚煞科，雖然讀者對英甲熟悉程度，未必及得上英冠或英超，但講到競爭性，呢個聯賽絕對唔低。聯賽榜前列數支球隊要爭直接升班資格，下游亦有球隊要力保一席英甲位置，所以都咪話冇睇頭，今日路西法「升班組」捧諾定咸森林，而「護級組」就撐般尼茅夫。 森林對手風流波
今季英甲冠軍早已落史雲斯手上，而第五及第六位修安聯及列斯聯已穩奪升班附加賽資格，剩低一個直接升班位置就由唐卡士打、諾定咸森林及卡素爾三隊去爭。由於唐卡士打只係領前一分，今仗若有閃失，隨時被森林或卡素爾過頭，所以真係一都唔可以放鬆。 睇番三隊今晚對手，都只係一中下游球隊，當中最有機會踢風流波，相信係森林對手伊奧維。由於伊奧維已成功護級，今仗變成例行公事，相信森林今晚主場出擊，三分絕對係志在必得。至於唐卡士打同卡素爾對手，分別係車頓咸及般尼茅夫，雖然後兩者實力有限，但相信兩隊唔會咁容易就範，因為般尼茅夫及車頓咸都要為護級而戰，所以呢兩場波可以話係全晚英甲競爭最激烈賽事。 般尼茅夫信得過
交代完前列爭直接升班形勢，就睇下游護級方面有幾激烈。包尾及尾二盧頓及維爾港提早降班，排尾三基寧咸數字上仍有機會成功護級，只要今晚作客列斯聯一定要三分，而車頓咸同般尼茅夫輸波就掂。若最終車頓咸和波、般尼茅夫失分及基寧咸贏波，就要計得失球。 至於第二十位車頓咸及二十一位般尼茅夫，由於兩隊對手唐卡士打同卡素爾要爭直接升班資格，要搶分確實唔易。但如果般尼茅夫到一分，而車頓咸輸波的話，車軍亦會因得失球較差而降班，相信般尼茅夫必以此為最低目標，以球隊近期六連勝佳態，值得信賴。至於第十九位克魯，則要車頓咸及般尼茅夫齊齊贏波，加上自己主場對奧咸輸先會降班，相信可以逃過厄運。 | 
