| 熱身賽一向難賭，不過今晚西班牙桑坦德主場對美國，2倍「讓球主勝」真係唔怕買！事關西班牙領隊阿拉干利斯極之不滿球隊上場贏秘魯表現，賽後罰球員加操不特止，今場仲會大變陣，唔到班「鬥牛勇士」歐國盃前最後一場熱身賽唔搏命，有射手當路雲等四名主力退隊美國點睇都冇機會偷雞！（廣東體育周四凌晨4:00直播）
西班牙上場熱身賽憑韋拿同卡迪維拿各建一功，主場以二比一擊敗秘魯，將不敗場數增至十五場，但衰在整體表現真係麻麻，當中費蘭度托利斯同沙比阿朗素踢到冇晒影，中堅馬真拿更同卡斯拿斯發生誤會解圍失誤，令球隊一度被追和，中止五百八十六分鐘冇失波紀錄，激到領隊阿拉干利斯賽後鬼咁，周一馬上罰班球員加操兩課。
除加緊操練，更有傳西班牙今場會大變陣，由艾比奧爾代替馬真拿打中堅，法比加斯、古爾沙則取代沙比阿朗素同費蘭度托利斯出任正選，先唔好理佢會打成點，其他球員知道連大牌費托踢得曳即刻冇正選，呢鋪唔搏就有鬼，唔好唔記得呢場仲要係西班牙歐國盃最後一場熱身賽，睇番荷蘭同意大利之前最後一仗都最少贏兩粒以上，我認為西班牙今場絕對唔會錯過大勝壯行色良機。 美國四主力退隊 對家美國上場作客兩球不敵英格蘭，中止○八年不敗紀錄，更雪上加霜係，上場因傷臨時缺陣，未能取得百場帽射手當路雲，賽前再次觸傷舊患，連同韋斯咸後史碧達、奧斯高同中場主力列卡度奇勒退隊，三線實力都削弱，呢鋪作客西班牙你話仲可以有咩寄望？ | 
