| 今晚揭幕戰由東道主之一瑞士迎戰捷克，瑞士今屆地頭出戰點都要搏到盡啦！今仗對家捷克實力雖然高一班，不過瑞士話晒有主場之利，要守和對手唔難喎！（無翡翠台、now632台、廣東體育及中央5台周日凌晨0:00直播）
瑞士領隊古恩選擇以老帶新，辛德路斯、巴尼達、比哈美同禾蘭芬等近年湧現新星，無錯係為球隊注入活力同生氣，但係講到要踢大賽始終未夠火候呢！所以都要搵番經驗老到球員，好似哈根耶堅、卡賓拿斯同埋麥連等等，傍住班後生！ 捷克鋒力減弱最擇使 瑞士世界級球星係就係數唔出幾多個，不過佢勝在防守出色，加上戰術實而不華，兼且有主場之利，Fans嗌行晒，士氣肯定高昂，今晚對住實力高一皮捷克，有力保不敗！
另一邊捷克無錯實力有番咁上下，但就弊在傷兵多，最大劑冇後上殺手路斯基，令到佢中場線創造力不足，連帶攻擊力亦會減弱！鋒力唔夠，好自然防線受壓力都會大啦，相信領隊布克拿都會好頭痛！好在應屆捷克足球先生贊古奴夫斯基膝傷趕得切好番，加上一班見慣大場面、有大賽經驗豐富球員壓陣，配合機動到不得了踢法，戰無不勝未必，但係想贏佢亦冇咁易！
所以衡量過兩隊都各有不足，想轟入對方龍門相信會有一定難度，何況話晒都係揭幕戰，主、客隊陣上都會比較謹慎，唔易分出勝負，和氣收場都唔奇唷！ | 
