| 唔好以為本地甲組波至有雙料娛樂呀，其實美國一樣有！聽朝新英倫革命主場首先上演一場美職賽事，之後再有巴西對委內瑞拉熱身賽美國波士頓舉行，但當然以呢場有更多娛樂性啦！以「森巴兵團」近年例炒委內瑞拉戰績，加上有中場路爾斯安達臣同基拔圖施華歸隊，巴西有望取得大捷，「讓球主勝」可捧！（開賽時間：周六早上9:10）
巴西上場三比二擊敗加拿大一役唔算贏得清脆，但其實當時球場狀況之差連領隊鄧加亦賽後呻過，表現唔可以作準。加上兩位中場路爾斯安達臣同基拔圖施華已歸隊，尤其有後者在陣，中場攔截力大增，防線失波機會自然大大減少。何況前線仲有迪亞高、羅賓奴同法比安奴上場各入一粒，狀態唔錯，加埋後備席柏圖同阿祖安奴，呢隊巴西當然值得睇好。 中場安達臣施華歸隊 相反，委內瑞拉隊雖然有馬略卡中場艾蘭高領軍，可惜佢隊友大部分實力平平，睇番上場熱身賽對洪都拉斯，開賽兩分鐘已失一球，防線咁脆弱點信佢頂得住巴西？最慘係呢班波要打到臨完場前十三分鐘僅僅靠十二碼追和，攻又唔得守又唔得可以靠乜？
至於交手往績亦同樣有利「森巴兵團」，因為兩隊近六次交手，巴西全勝之餘仲最少贏三球或以上，以呢個數據加上近況睇，巴西想淨勝兩球唔係太難！ | 
